ದಂತ ಚಿಕಿತ್ಸೆ ಹಾಗೂ ಸ್ಮಶಾನ  ವೈರಾಗ್ಯ

ಹಲ್ಲು ನೋವೆಂದು ಚಿಕಿತ್ಸೆಗೆ ಬಂದಿದ್ದ ಮನುಷ್ಯನಿಗೆ ಅರಿವಳಿಕೆಗಯ  ಇಂಜಕ್ಷನ್ ಚುಚ್ಚಿ ನನ್ನ ಕೆಲಸಕ್ಕೆ ಅನುವಾಗುತ್ತಿದ್ದೆ. ನೋವು ನಿಂತ ಕೂಡಲೇ ಆತನ ಭಯನಿವಾರಣೆಯಾಗಿ ಮಾತು ಪ್ರಾರಂಭವಾಯಿತು.

"ಅಬ್ಬಾ ಮೂರುದಿನ ನೋವುಸಹಿಸಿ ಸಹಿಸಿ ಸಾಕಾಯಿತು ಡಾಕ್ಟ್ರೇ. ಮತ್ತೊಮ್ಮೆ ಈ ತಾಪತ್ರಯಬೇಡ ಎಲ್ಲಾ ಹಲ್ಲುಗಳನ್ನೂ ಸರಿಮಾಡಿಬಿಡಿ. ಮತ್ಯಾವುದಾದರೂ ಹಲ್ಲು ಹುಳುಕಾಗಿದೆಯೇ ? "

"ಇನ್ನೂ ಐದಾರುಹಲ್ಲು ಹಾಳಾಗಿವೆ. ಈಗಲೇ ಚಿಕಿತ್ಸೆಮಾಡಿದರೆ ಮುಂದೆ ತೊಂದರೆಯಾಗದು "

"ಏನು ? ಐದಾರೆ ?" ಆತ ಹೌಹಾರಿದ .

"ಹೌದು. ಹುಡುಕಿದರೆ ಇನ್ನೂ ಒಂದೆರಡು ಸಿಕ್ಕಾವು "

"ಎಲ್ಲಾ ಸರಿಮಾಡಿಬಿಡಿ ಡಾಕ್ಟ್ರೇ . ಅದೇನೇನು ಮಾಡಬೇಕೋ ಮಾಡಿಬಿಡಿ "

"ಒಂದು ದಿನದಲ್ಲಿ ಆಗುವ ಕೆಲಸವಲ್ಲ, ಸುಮಾರುಬಾರಿ ಬರಬೇಕಾಗಬಹುದು "

"ಸರಿ ಬರುತ್ತೇನೆ ಬಿಡಿ. ನನಗೆ ಈಗಲೇ ಎಲ್ಲಕ್ಕೂ ಅಪ್ಪಾಯಿಂಟ್ಮೆಂಟ್ ಕೊಟ್ಟುಬಿಡಿ. ಎಲ್ಲಾ ಸರಿಯಾಗಿಬಿಡಲಿ."

"ಮತ್ತು ಫೀ ಸಹ ಸಾಕಷ್ಟಾಗಬಹುದು "

"ಅಂದರೆ "

"ಬಹುಶಃ ಹತ್ತು ಹದಿನೈದು ಸಾವಿರ "

"ಹಣ ಎಷ್ಟಾದರೂ ಚಿಂತೆಯಿಲ್ಲ . ಎಲ್ಲ ಸರಿಯಾದರೆ ಸಾಕು . ಮತ್ತೊಮ್ಮೆ ಈ ತೊಂದರೆ ಬೇಡ."

"ಆಯಿತು. ಇಂದಿನ ಕೆಲಸಮುಗಿಯಲಿ"

"ಮತ್ತೆ ಉಳಿದಹಲ್ಲುಗಳನ್ನೆಲ್ಲಾ ಒಮ್ಮೆ ಕ್ಲೀನ್ ಮಾಡಿಬಿಡಿ ಡಾಕ್ಟ್ರೇ. ಅದಕ್ಕೂ ಅಪಾಯಿಂಟ್ಮೆಂಟ್ ಕೊಟ್ಬಿಡಿ "

"ಆಯಿತು"

"ಹಾಗೆ ಈ ಎರಡುಹಲ್ಲು ಕಿತ್ತಿದ್ದು ಖಾಲಿ ಜಾಗ ಇದೆಯಲ್ಲಾ ಅಲ್ಲಿ ಹಲ್ಲು ಕಟ್ಟಲಾಗುತ್ತದೆಯೇ  ?"

"ಆಗುತ್ತೆ"

"ಹಾಗಿದ್ದರೆ ಅದನ್ನೂ ಮಾಡಿಬಿಡಿ "

ನನಗೆ ಈ ಮಾತುಕತೆ ಹೊಸದೇನಲ್ಲ. ಹತ್ತರಲ್ಲಿ ಎಂಟುಜನ ಒಮ್ಮೆ ಹಲ್ಲುನೋವಿನ ಚಿಕಿತ್ಸೆಗೆಂದು ಬಂದವರು ಮತ್ತೆಲ್ಲವನ್ನೂ ಸರಿಮಾಡಿಸಿಕೊಳ್ಳುವ ಇರಾದೆ ತೋರಿಸುತ್ತಾರೆ. ಹಲ್ಲು ನೋವಿನ ಭಾದೆ ಕಡಿಮೆಯೇನಲ್ಲ. ಮತ್ತೊಮ್ಮೆ ಬೇಡವೆನ್ನಿಸುವುದು  ಸಹಜವೇ.

ನಾನು ಚಿಕಿತ್ಸೆ ಮುಗಿಸಿದೆ. ಆತ ಮೇಲೆದ್ದ .

"ಈಗಲೇ ಉಳಿದ ಎಲ್ಲಾ ಚಿಕಿತ್ಸೆಗೂ ಅಪ್ಪಾಯಿಂಟ್ಮೆಂಟ್  ಕೊಟ್ಬಿಡಿ ಡಾಕ್ಟ್ರೇ "

"ಸರಿ ನಾಡಿದ್ದು ಸಂಜೆ ಐದಕ್ಕೆ ಬನ್ನಿ . ಉಳಿದ ಕೆಲಸ ಶುರುಮಾಡೋಣ "

ಈ ಮಾತುಕತೆಯಾಗಿ ಆರುತಿಂಗಳಾಯಿತು. ಮನುಷ್ಯ ಪತ್ತೆಯಿಲ್ಲ. ಇನ್ನೆರಡು ವರ್ಷದನಂತರ ಮತ್ತೊಂದು ಹಲ್ಲು ಬಾಧೆಯಾದಾಗ ಬಂದೇಬರುತ್ತಾನೆ ಆತ. ಮತ್ತೆ ಇದೇ ಸಂಭಾಷಣೆ. ಮೊದಲೇ ಹೇಳಿದಂತೆ ನನಗೆ ಇದು ಹೊಸದಲ್ಲ. ನಾನು ಈ ಕೆಲಸ ಶುರುಮಾಡಿ ನಲವತ್ತು ವರುಷ ಆಗುತ್ತಾ ಬಂತು. ಈ ಮಾತುಕತೆ ನೂರಾರು ಜನರೊಡನೆ ಆಗಿದೆ. ಅದು ನಮ್ಮ ಡೆಂಟಲ್ ಛೇರಿನ ಪ್ರಭಾವ !"

ಸ್ಮಶಾನದಲ್ಲಿ ಸಂಭಂದಿಯೋ ಸ್ನೇಹಿತನದೋ ದಹನಕ್ಕೆಂದು ಹೋದ ಮನುಷ್ಯನಿಗೆ ಜೀವದ ಅಂತ್ಯ ಕಂಡಂತೆ  "ಈ ಜೀವನ  ಇಷ್ಟೆಯೇ " ಅನಿಸುತ್ತದಂತೆ.  ತನ್ನ  ಅಹಂ, ಆಸೆ, ಕಾಮ, ಕ್ರೋಧಗಳನ್ನೆಲಾ ತೊರೆದು, ಅಷ್ಟೇ ಏಕೆ, ಈ ಜೀವನ ದಿಂದಲೇ ಮುಕ್ತನಾಗಬೇಕೆಂಬ ವೈರಾಗ್ಯ ಕಾಣಿಸಿಕೊಳ್ಳುತ್ತದಂತೆ. ಅದಕ್ಕೆ "ಸ್ಮಶಾನ ವೈರಾಗ್ಯ "ವೆನ್ನುತ್ತಾರಂತೆ. ಮರಣ ಕಾರ್ಯ ಮುಗಿಸಿ ಹೊರಕ್ಕೆ ಬಂದಂತೆ ವೈರಾಗ್ಯ ತಲೆಯಿಂದ ಹೊರಹೊಕ್ಕು ಎಲ್ಲ ಮನುಷ್ಯಗುಣಗಳು (ಅವಗುಣಗಳು) ಮತ್ತೆ ತುಂಬಿಕೊಳ್ಳುತ್ತವಂತೆ. ನಾಯಿಬಾಲ ಡೊಂಕೇ!

ಹಲ್ಲುಗಳನ್ನೆಲ್ಲಾ ಒಮ್ಮೆ ಸರಿಪಡಿಸಿಕೊಂಡುಬಿಡಬೇಕೆಂಬ ಆಶಯ  ಸ್ಮಶಾನ ವೈರಾಗ್ಯದಂತೆಯೇ  !